Asteburuan mendi igoeren zirkuituko azken aurreko proba lehiatu dute Urrakin. Turismoen mailan bigarren amaitu du Iban Tarsiciok (Durangaldea Racing) eta hirugarren Igor Urienek (Abadiño Karting Taldea). Ondorioz, podium berera herri eta auzo bereko pilotu bi igo dira. Ez da sarritan ikusten den gertaera bat. “Tarsi haundiagaz podiuma elkarbanatzea ilusio itzela” izan dela adierazi du Igor Urienek sare sozialetan. Tarsiciok ere “ilusio berezia eta handia” egin diola azpimarratu nahi izan du.
Tarsicio mendi igoeren txapelketako liderra da Malvinaseko (Karrantza-Lanestosa, urriak 29-30)) azken probaren faltan. 20 puntutik gorako aldeari eusten dio eta azken proban aurreneko hamarretan sailkatzea nahikoa luke txapelketa bigarren urtez jarraian irabazteko.
Turismoen sailkapen nagusiko hamar onenen artean daude Durangaldeko Iñigo Olabegogeaskoetxea eta Lebeiti pilotuak ere.
Monoplazen sailkapen nagusian, berriz, hirugarren tokian kokatuta dago Kepa Amantegi durangarra.