"Den-dena", diote antzerki konpainiako kideek. "Den-dena, baita behar ez duzuna ere. Batik bat, behar ez duzuna", gehitu dute. Azken errekadu batek, baina, ataka estuan ipiniko ditu: ezer gehiago ez erosteko gogoa saldu behar dute. Horrela, gaur egungo aro "turbokapitalista" honetako ekonomiaren hazkundearen metafora legez aurkezten dute antzezlana. "Askok kolapsoaz hitz egitean sistema osoaren amaiera aipatzen dute. Guk, ostera, fikzioa mugagabea eta moldakorra dela erantzuten dugu. Stocka etengabe berrizten dela, joera berriak etengabe agertzen direla. Agian ezingo dugu apokalipsia lehen lerrotik ikusi, baina irudimenaren eraikuntza ahul hau zabaldu dezakegu, eta haren zentzugabetasunaz barre egin", azaldu dute.
Kolapsoa martxoaren 1ean estreinatu zuten, Usurbileko Sutegin, eta Zornotzakoa birako bigarren emanaldia da. Urtea amaitu aurretik, beste hogei bat emanaldi dituzte aurretik; besteak beste, apirilaren 9an, Atxondon.