Zornotzako taberna eta jatetxeek euren hanburgesa sorkuntzarik onenak eskainiko dituzte, eta herritarrek originaltasuna eta kalitatea epaituko dituzte gero. Parte hartu gura duten taberna eta jatetxeek martxoaren 6ra arte dute aukera izena emateko, janalai@amorebieta.eus helbide elektronikora mezu bat bidalita. "Lehiaketa honek hanburgesen sukaldaritza sormenean ipini du arreta, eta establezimenduei gonbit egingo die osagai berritzaileekin konbinazioak sortu ditzaten, herriko hanburgesarik zaporetsuena eta originalena sortzeko helburuz", azaldu du Zornotzako Udalak.
Aurretik, Jan Alai txapelketak pintxo lehiaketa formatua izan du. Parte hartzaileek sormenerako askatasuna izan dute konbinazio eta zapore berriak eskaintzeko, eta arrakasta handia izan duen ekimena izan da Zornotzan. Hanburgesenagaz ere antzeko harrera izatea gura dute antolatzaileek.