Berrizen Aitor Hernandez eta Ainara Elbusto nagusitu ziren eta Zornotzan ere eurak izango dira irabazteko hautagai nagusiak, Jonathan Lastragaz batera. Zornotzako aurtengo proban nobedade bat dago: San Migel kaleko lanak direla eta, irteera eta helmuga Nafarroa kaleko aparkaleku handian izango dira. Antolatzaileek ibilbidea ere moldatu behar izan dute. 09:30ean Master 40, 50 eta 60 mailako lasterketak hasiko dira, eta segidan kadeteak (10:30), juniorrak (11:15) eta eliteak (12:15) lehiatuko dira.
Junior mailan, eskualdeko ziklistak faboritoen artean daude. Zornotzako F2 Informática taldeko Eñaut Bilbao mallabitarra oso ondo dabil aurten. Tolosako ziklo-krosa irabazi zuen eta Elorrion podiumera igo zen. Café Dromedario-Flotamet taldeko Andoni Villate zornotzarra eta Ander Mendizabal abadiñarra ere aurrean ibiltzeko hautagaien artean daude.