Hemeretzigarren edizio honetan Anna Morales (SizeMatters) zientzia dibulgatzaileak 'Ciencia con Pokemon' berbaldiagaz parte hartuko du; bertan, Pikachu eta Bulbasur bezalako pokemonen atzean dauden azalpen zientifikoak eskainiko ditu. Alexby11 youtuberra ere Mangamoren egongo da; zortzi milioi jarraitzaile ditu influencerrak. Dragoi Bola Super telesaila euskarara bikoizteaz arduratzen den lantaldeak ere bisitatuko du Zornotza asteburuan. Horrez gainera, egitarauan artista, denda eta kultur eragile zornotzarren parte hartzea sustatu dute antolatzaileek. "Mangamore Japoniako manga edo kulturari buruzko jaialdia baino gehiago da, sormena, tokiko parte hartzea eta belaunaldien arteko topaketa bihurtu den hitzordua da", azaldu du Ainhoa Salterain Zornotzako alkateak. Egitarau osoa www.mangamore.eus atarian dago ikusgai.
Bestalde, Japoniako tradizioek ere izango dute euren erakusleihoa Mangamoren. Horrela, zapatu arratsaldean Kazeoto taldeak kontzertua eskainiko du Amorebieta IV pilotalekuan; bertako instrumendu tradizionalekin egindako ikuskizuna da.