Zer dela-eta Tallinnen?
Bikotekideak Estonian lan egiten zuen, eta nik ikasgai bat baino ez nuen falta Industria Ingeniaritza ikasketak amaitzeko. Eta praktikaldia Estonian egiteko aukera bilatu nuen. 2023ko abuztutik abendura arte praktikak egin eta gero, enpresan lanean geratu nintzen. Hemen nago harrezkero.
Ondo egokitu zara herrialdera?
Kalera irten eta zero azpitik 10 gradura egotera ohitzea apur bat kostatu zait. Gainera, isiltasun handia dago. Batzuetan, autobusean noanean ematen du neuk bakarrik egiten dudala berba. Baina, oso ondo nago; ondo egokitu naiz. Egia da lagun estoniar askorik ez dudala, atzerritarrekin ez dira batere irekiak. Lagun taldean brasiladarrak, indiarrak... toki askotakoak gaude.
Negua gogorra da Estonian. Horretara egokitzea izan da gatxena?
Oso gogorra. Aurreko negua urri amaieran hasi zen, eta maiatzera arte elurra egin zuen. Maiatzetik irailera bitartean, bero handirik egiten ez badu ere (20-25 gradu), eguraldi ona egiten du. Dena oso berde jartzen da eta Euskal Herria gogorarazten dit, hemen ia mendirik ez badago ere. Bai, gatx egin zait klimara egokitzea, baita janarira ere. Barazkiak, fruta... beste herrialde batzuetatik dakartzate, heldu bakoak. Hemen landu ez den tomateak ez du ia zaporerik. Bestalde, okela oso garestia da.
Zerk harritu zaitu gehien?
Estonia oso aurreratuta dago, dena dago digitalizatuta. Bost egunetara, banuen bertako nortasun agiria; hasierako tramitea egiteko ere segituan hartu ninduten. Horrek onerako harritu nau. Txarrerako, ostera, estoniarren izaera hotza. Laguntza eskatu dudanean, modu atseginean lagundu didate, baina horretara mugatzen dira.
Zeren falta igartzen duzu gehien?
Familiarena eta lagunena, jakina! Baina eurekin emandako denbora gehiago disfrutatzen eta baloratzen ikasi dut. Euskal Herriko klimaren eta janariaren falta handia ere igartzen dut.
Ez da Zornotzatik kanpora egiten duzun lehenengo egonaldia.
Kalifornian (AEB) hilabetean egon nintzen, 16 urtegaz, ingelesa ikasten. Ondoren, Maltan eta Istanbulen (Turkia) egin izan ditut praktikaldiak, eta Munichera (Alemania) joan nintzen Erasmus programagaz. Han ezagutu nuen bikotekidea; Portugalekoa da. Bidaiek leku askotako lagunak izatea eta askotariko kultura eta gastronomiak ezagutzea ekarri didate.
Etorkizunean non ikusten duzu zeure burua?
Estoniako klima nahiko gogorra egiten zaigu, eta bi-hiru urte barru Suitzara edo Alemaniara joatea pentsatu dugu. Eta aurrerago, Bartzelonara (Herrialde Katalanak); hondartza gura dugu. Zornotza txiki geratu zait (barrez).
Beste nora joan gura zeunke?
Japoniak asko erakartzen nau.