Amaitu dira oporrak. Astelehenetik martxan da denboraldiaurrea Amorebietarentzat. Aurpegi berri dezente izan zen Urritxeko lehenengo entrenamenduan, eta ez aulkian bakarrik, Julen Guerrero entrenatzaile eta Jabi Luaces kirol zuzendari berriekien; baita jokalarien artean ere.
Eskuin hegala indartzeko, Pablo Hervias (Logroño, 1993) ekarri dute. Lehen eta Bigarren Mailetan 200 partidu baino gehiago jokatu ditu Reala, Osasuna, Real Oviedo, Elx, Real Valladolid, Eibar eta Malaga taldeetan. 2023a Boliviako klub batean hasi zuen eta neguko merkatuan Lehen Federazioko Rayo de Majadahonda taldera joan zen.
Zelai erdirako Nassourou Ben Hamed Ndongo 22 urteko kamerundarra ekarri dute. Iaz Extremadurako Merida taldean aritu zen. Kamerungo selekzioaren beheko kategoriekin Munduko Txapelketa eta Afrika Kopa jokatu ditu. Aipatutakoez gainera, Alvaro Yuste erdilaria (Madril, 2001), Alberto Gonzalez (Aviles, 1998) eta Alex Aizpuru 'Kaxe' (Azpeitia, 1994) aurrelariak, Mikel Kortazar (Ondarroa, 1999) eta Jon Ander Amelibia (Leioa, 1994) atzelariak, eta Sergio Camacho (Aranjuez, 2002) eta Alex Carbonell (Beasain, 2001) hegalekoak ere batu dira Amorebietara orain arte.