Sociedad Artistica Cultural Zornoza elkarteak (SACZ) berbaldi bat antolatu du Emakumeen Nazioarteko Egunaren harira. Elkarteak gonbidatuta, Lara Izagirre zinegileak berbaldia eskainiko du martxoaren 12an zinemagintza emakumeen ikuspegitik aztertzeko. Izagirrek gidoilari, zuzendari eta ekoizle lanetan bizitakoak azalduko ditu.
Zornotzarrak eskarmentu handia du zinemagintzan. Nora, Un Otoño sin Berlin edo Pelikula baten bila filmak zuzentzeaz aparte, parte hartze zuzena izan du Errementari, Vitoria 3 de marzo eta 20.000 especies de abejas filmetan. Azken honetan ekoizle lanak egin zituen. Filmak hiru sari eskuratu zituen Espainiako Zinema Akademiak antolatutako Goya sariketan.
Izagirreren berbaldia martxoaren 12an izango da, Harrison eraikineko 6. zenbakian, 18:00etan.