Aurten, Pedro Iparragirre Etxebarria zornotzarrak izango du lore eskaintza egiteko ardura. "Iparragirrek 6 urte zituen Amorebieta eta Etxano bonbardatu zituztenean. Gerran bizirik iraun zuen umeetariko bat da. Zornotzatik alde egin eta inguruko herrietan hartu zuen babesa", azaldu du Zornoza elkarteko kide Kepa Jon Aranak. Gogora Institutuaren bonbardaketen atlasak jasotzen duenez, frankistek 24 bider bonbardatu zuten Zornotza. Erasoetan Italiako eta Alemaniako hegazkinek parte hartu zuten.
Ekitaldia domekan egingo dute, 12:00etan, Zelaieta parkean. Alaiak eta Zornoza abesbatzek, Udabarri dantza taldeak, Udazken txistulari taldeak, eta Gogora Institutuko Aintzane Ezenarro zuzendariak parte hartuko dute.