Partidu erabakior hori zapatuan jokatu dute, Urritxen, 19:30ean, Gimnastic de Tarragona taldearen aurka. Zornotzako futbol zelaia lepo beteko da. Klubak martitzen eguerdian iragarri zuen sarrera guztiak agortuta daudela.
Tarragonako taldea jokoan ezer gutxi duela etorriko da Zornotzara. Joan zen asteburuan, 1-0 menderatu zuten Cornellá eta orain sei puntura du jaitsiera. Ez da behar larrian dagoen taldea.
Amorebieta sasoi betean heldu da azken txanpara. Liga hasiera eskasa egin ostean, azken 26 partiduetan hamasei garaipen eta zortzi berdinketa pilatu ditu. Azkenengo berdinketa joan zen asteburukoa da, SD Logroñesen zelaian lorturikoa. Haritz Mugikak entrenaturiko gizonek markagailuan aurreratzea lortu zuten, Ewan Urain durangarraren gol bati eskerrak, eta hogei minutu baino gehiagoan Bigarren Mailako taldea izan ziren, baina Logroñesek berdinketaren gola sartu zuen luzapenean.
Bihar igoera lortu ezik azkenengo bala bat geratuko zaio Amorebietari. Maiatzaren 27an, dagoeneko maila galduta dagoen Athletic B-ren kontra jokatuko du.