Udalak adierazi duenez, Zornotzan gero eta gehiago dira guraso bakar batek osatutako eta ardurapean seme-alabak dituzten familiak. Bada, gero eta handiagoa den joera horri erantzun guran, aldaketa txiki bat egin du ordenantza fiskaletan. Guraso bakarreko familia zornotzarrek %25eko beherapena izango dute kirol zerbitzuetako familia-abonuan. Miren Martiarena ogasun zinegotziak adierazi du udalak "gehien behar duten kolektiboei babesa ematea" dutela helburu. Bestalde, guraso bakarreko familiak laguntzeaz aparte, udalak beste hobari bat sortu du kirol zerbitzuetan, langabezian gutxienez hiru hilabete daramaten pertsonentzat. Udal euskaltegiari dagozkion prezioak ere aldatu egin dituzte.