Zornotza Euskal Herri osotik ailegatutako emakume nekazarien eta artisauen topaleku izango da martxoan

Anboto 2022ko ots. 7a, 09:39

Martxoaren 5ean Emakume Nekazari eta Artisauen XXIV. azoka egingo dute Zelaieta parkean. Bertan postua ipintzeko inskripzio epea zabalik dago. 

Zornotzako Udaleko Berdintasun Sailak Emakume Nekazari eta Artisauen Azokan izena emateko epea zabaldu du. Aurtengoa azokaren XXIV. edizioa izango da, eta iaz pandemiagatik egin behar izandako etena hautsiko du. Azoka martxoaren 5ean egingo dute Zelaieta parkean, Martxoaren 8ko aldarrikapenen testuinguruan. Udalak adierazi duenez, azokaren helburua emakumeek nekazaritza zein artisautza arloan egiten duten lana ikusaraztea da.

Askotariko produktuak egongo dira eskuragarri: ogia, gozogintza, marmeladak, frutak eta barazkiak, fruta-gozokiak, arropa eta osagarriak, besteak beste. 20 postu eta txosna bat egongo dira. Goizez eta arratsaldez egongo dira zabalik: 10:00etatik 15:00etara eta 17:00etatik 21:00etara.

Postua ipini gura duenak izena emateko epea zabalik dauka otsailaren 16ra arte. Udalaren Berdintasun Sailak honako bide hauek ipini ditu orretarako: web guneko inprimakia, 688809818 edo 946300769 zenbakiak eta berdintasuna@amorebieta.eus helbide elektronikoa. 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!