Eibarrera Getafen jokatu ostean iritsiko da 33 urteko atzelaria; bi denboraldi egin ditu talde madrildarrean. Eibarreko iturriek Etxeitak duen esperientzia nabarmendu dute. Zornotzarrak 148 partidu jokatu ditu Lehen mailan, eta 111 Bigarren mailan. Europako txapelketetan ere lehiatu da Xabi Etxeita: bi partidu Champions Leaguen eta beste 25 Europa Leaguen.
Besteak beste, Getafen, Athleticen, Huescan, Elchen, Cartagenan eta Amorebietan jokatu du Xabi Etxeitak.