Zornotzako Udalak harrera egin die Amorebieta futbol klubeko ordezkariei

Bigarren Mailara igo izanaren ospakizunek eta errekonozimenduek ez dute etenik. Gaur harrera instituzionalaren txanda izan da. Jon Larrea Amorebieta klubeko presidenteak, Asier Goiria kirol zuzendariak, Iñigo Velez de Mendizabal entrenatzaileak eta hainbat jokalarik Zornotzako Udaleko arduradunen berotasuna jaso dute. "Ikaragarria egin duzue", adierazi du Andoni Agirrebeitia alkateak. Euretaz "oso harro" daudela adierazi du eta Amorebietaren izena lau haizetara zabaltzen jarraitzera animatu ditu. Jon Larreak, berriz, "eskerrak" eman dizkio udalari "erabateko babesa" eskaintzearren.  "Ez zen posible izango zuek barik", adierazi du. Futbol klubak kamiseta bat oparitu dio udalari.