Ereindako haziak hasita daude loratzen. Harrera taldea buru-belarri ari da Bizkargi taberna zena kafetegi sozial bihurtzeko lanetan. Zornotzan errotzen ari diren familia migranteen zein herritar guztien topaleku izango da kafetegi-dastalekua. "Maitasun eta dedikazio osoz ari" dira gara "karta osatu eta produktuak aukeratzen". Kalitatezko eskaintza bat eman gure dute, Harrera taldearen "oinarritara ahalik eta gehien gerturatuko dena". Tokiko produktu ekologikoak eskaintzeko asmoa dute eta "giro goxo eta etxekoia duen lokala" sortu gura dute.
Kanpaina zenbakitan
Interneteko goteo.org atarian garatu dute kanpaina, crowdfunding lez ezagutzen den sistema erabilita. Hau da, kanpainan parte hartzeko interesa agertu duten herritarrek bakoitzaren poltsikoaren araberako ekarpen ekonomikoak egiteko aukera izan dute. 10, 20, 50, 100, 150, 300 eta 500 euroko ekarpenak egiteko aukera egon da. Eta, guztira, 158 herritarrek egin dituzte dohaintzak.
Norbanakoen ekarpenak izan dira ia denak, baina hainbat elkarteren babesa ere igarri da. Besteak beste, Zornotzako Talde Feministaren ekarpen ekonomikoa jaso du proiektuak. Baita Zaparrada Batukada taldearena ere.