2021rako aurreikusitako inbertsioen %25, 840.000 euro inguru herritarren proposamenetatik tiraka garatu gura du Zornotzako Udalak. Aurrekontu parte-hartzaileetan ekarpenak egiteko epea zabalik dago. Apirilaren 30era arte egongo da irekita. Andoni Agirrebeitia alkatearen esanetan, "parte hartzea aktiboa" sustatzeko helburua du egitasmoak. "Zornotzarren iritzia zein den jakin gura dugu, gero horri erantzun bat emateko", dio. Udalak aurrekontu parte hartzaileak antolatzen dituen hirugarren aldia da honakoa.
Baldintzak eta parte hartzeko bideak
Herritarren proposamenek baldintza batzuk bete beharko dituzte. Besteak beste, udalaren eskumeneko proposamenak egin ahalko dira, legezkoak, interes orokorrekoak eta teknikoki zein ekonomikoki bideragarriak. Behin proposamenak jasota, udalaren bulego juridiko, tekniko eta ekonomikoak arduratuko dira proposamenak lehenetsi eta aurrera egingo dutenak aukeratzeaz.
Zornotzako Udalaren web orrian, www.ametx.eus gunean, Herritarren Arreta Zerbitzuan edo Zelaieta zentroan egin ahalko dira proposamenak.