Uxarte sagardotegiarekin batera, Zornotzako Etxerriaga sagardotegiak, Berriatuko Laka-Erdi, Gizaburuagako Laneko, Gatikako Etxebarria eta Eguskiza, Lezamako Erdikoetxe eta Markina-Xemeingo Axpe sagardotegiek hasi dute denboraldia.
Enbaxadore txapeldunak
Javier Conde atleta paralinpiko bilbotarra da. Atletismo arloko makina bat domina irabazi izan ditu Mundu zabalean jokatutako Olinpiar jokoetan. Besteak beste, Bartzelonan (Herrialde Katalanak), Sidneyn (Australia), Atenasen (Grezia) eta Atlantan (Ameriketako Estatu Batuetan) eskuratu ditu urrezko, zilarrezko eta brontzezko dominak.
Mikel Garcia atleta, berriz, Javier Conderen ikaslea da. Gaztea da, baina dagoeneko argi utzi du gaztea izanagatik beste maila batean dagoela. Iaz urrezko hiru domina eskuratu zituen Australian jokatutako Inas Global Games kirol-probetan. 1.000 atleta baino gehiagoren artean nabarmendu zen Garcia. Egun, Basauriko Saiatu atletismo klubean entrenatzen du.
Aurreko edizioetan Onintza Enbeita bertsolaria, Aiora Renteria Zea Mays taldeko kantaria, Aitzol Atutxa aizkolaroa edo Aitor Elizegi sukaldaria izan dira Bizkaiko sagardo denboraldia inauguratu duten pertsonaietako batzuk.