Ertzaintza "langileak jipoitzera" bidali izana leporatu dio Durangaldeko LAB sindikatuak EAJri. "Herritarren lan baldintza eta bizi baldintzen alde egon beharrean, patronalaren alde, herritarren eskubideak zapaltzen dituztenen alboan lerrokatu da", azaldu du sindikatuak ohar batean.
Karga polizialari dagokionez, baina, gauzak ez daude argi. LAB sindikatuak karga poliziala egon dela dio. Ertzaintzak, aldiz, esan du ez dela karga polizialik egon. "Dei bat jaso dugu. Industrialdeko auto batzuetan kalteak eragin direla eta enpresaren batera objektuak jaurti dituztela esan digute. Pikete taldeko langileetako batek agente bat kolpatu du, eta hainbat identifikazio egin dira gero", adierazi du Ertzaintzaren prentsa zerbitzuak.
Aurreko egunetan baino jarraipen handiagoa
Durangaldeko LAB sindikatuaren arabera, eguazteneko greba egun hau, astelehenekoa eta martitzenekoa baino jendetsuagoa izan da. %90 inguruan kokatu dute parte hartzea eta azaldu dute "eskualdeko enpresa handi eta ertain gehienek" gelditu egin dutela ekoizpena.
Sindikatuak mobilizazioegaz segituko duela adierazteaz gain, eskertu egin ditu pentsiodunak, Eragin eta Harro! plataformak, mugimendu feminista, ikasle eta gazte mugimenduak, eta norbanako herritarrak.