Zein da kafe ona ateratzeko sekretua?
Hiru aldagai daude: lehengaia, kafe-makina eta bakoitzaren eskua. Jarrera eta lan intrusismorik ez egotea ere ezinbestekoak dira. Ikasi egin behar da garagardoa edo kafea ateratzen. Kafe-makinagaz dabiltzan gehienek ez dute nahita txarto egiten, hala ikasi dutelako baino. Ez dute izan nork erakutsi.
Horretan lanean zabiltza.
Bai, kafea nola atera behar den erakusten nabil. 15 ostalariri kafe luze bat nola atera behar den galdetuta, bakoitzak era bat azalduko digu. Baina era bakarra dago ateratzeko. Kontua da ez dela erakutsi. Jendeak ondo ateratako kafe on bat hartzea dut helburu.
Kafea neurriz hartzea gomendatzen dute. Ez da zure kasua.
Kafea munduko antioxidatzaile natural nagusienetakoa da. Ona da bihotzerako, gibelerako, alzheimerra dutenentzat... Onurak gehiago ditu kalteak baino. Baina kafe ona izan behar da.
Eta zein da hori?
Beste kafetegiekiko errespetutik, esango dut %100 arabikoak erabiltzen dituzten tokietara jo behar dela. Bi bider kafeina gutxiago dute. Kafe mingotsera ohitu gara, baina zapore gozoa edo garratza duena da ona.
Estimatzen dugu kafe ona?
Zenbat eta gazteago, orduan eta kafe gehiago kontsumitzeko joera dago, kafe hobea gainera. Aukerak asko zabaldu dira. Organikoa, konpostagarriak... daude modan.
Hartutako kafearen isla gara?
Neurri batean, bai. Adibidez, kafe luzea edo amerikarra hartzen duenari, kafeaz gozatzea gustatzen zaio; ur asko dutenak aromatikoagoak dira, gozoagoak. Denboragaz hartzekoak. Espresoa edo Ristrettoa garratzagoa da, indartsuagoa. Bakoitzak gustatzen zaion erara hartu behar du kafea. Ondo jarri diezagutela lortu behar da.
Nola gustatzen zaizu zuri?
Era guztietara. Zale amorratua naiz. Plazerra dut lanbide.
2017an Euskadiko Barista Lehiaketa irabazi zenuen. Bueltatu zara lehiara?
Munduko txapelketara aurkeztu ez izanaren arantza dut, epaile lez lasaiago ibili arren.
Jatorrizko kaferik gustukoena?
Etiopia edo Kenyakoa; kafearen bihotza dago han. Baina Kolonbiakoa, Honduraskoa edo Guatemalakoa ere gustuko ditut. Laboraria ondo egiten saiatu den toki horretakoa.
