7. Gazte Eguna goizetik gauera arteko egitarauagaz dator. Zazpigarren edizioari keinu bat egin guran, ekitaldien ordutegiek zenbaki horregaz lotura izango dute. Jaieguna 10:37an hasiko da, txupinazoarekin eta erraldoien eta Bizkargi 1937 Zanpanzarren laguntzagaz. Ondoren, 12:07an, gazte olinpiadetan lehiatuko dira Zornotza eta Usansolo, iazko errebantxa lez. Gero, Zelaietako karpan bazkaritarako batuko dira eta Etxebarria aita-semeek alaituko dute bazkalostea.
Arratsaldean, Elektrotxuflagaz Luis Urrengoetxea kalera eramango dute jai-giroa. Eguna kontzertuekin biribilduko dute, 22:07an. Batetik, Obrint Pas taldean ibilitako Xavi Sarriá-k zuzenekoa eskainiko du 'El cor de la fera' talde elektrikoak lagunduta. Bestetik, The Zopilotes Txirriaos talde nafarraren kontzertua ikusteko aukera ere egongo da Zelaietako karpan.