Iazko irailean egindako batzarrera batutakoen %85ak koalizioaren alde egin zuela informatu dute ohar batean. 2015eko udal hauteskundeetara hautesle-talde moduan aurkeztu ziren, baina azken lau urteetan “testuinguru politikoa aldatu” egin dela uste du Hiri Ekimeneko Alba Gutierrezek. “Hautesle-talde formatuak indarrak gutxitzea ekarri diezaieke erakundea osatzen duten pertsonei”, adierazi du.
Koalizioa osatu arren, biltzar bidezko ereduari “legitimitate osoa" ematen jarraituko dutela aurreratu du. “Erabakiak herritarrek har ditzatela gura dugu, alderdi batekoa izan zein independientea izan. Formatua aldatuko da, baina ez funtzionamenduaren esentzia”, gehitu du.
Hurrengo hileetan egingo dituzten batzarretan hauteskunde programa landuko dute eta koalizioko hautagaitzak erabakiko dituzte, besteak beste.