Birziklapenean jaioak gara lelopean, birziklatzeak duen garrantzia gizarteratzeko jardunaldi bat antolatuko dute Zornotzako Udalak, Eusko Jaurlaritzak eta Bizkaiko Foru Aldundiak, Ecovidrio eta Ecoembes entitateekin batera.
Informazio karpa bat jarriko dute Zelaieta parkean bihar, 16:00etatik 20:00etara. Karpara bertaratzen diren heldu guztiek ondorengo erronkan parte hartu dezakete: ontzi batean zenbat kortxo dauden asmatzea edo ahal den gehien gerturatzea. Gehien gerturatzen den pertsonak beirazko ontzietan ontziratutako bertako produktuez osatutako saskia jasoko du.
Gune horretan bi ingurumen-hezitzaile egongo dira eta gerturatzen den orori informazioa eman eta zalantzak argitzeaz gainera, tailer eta jolas batzuetan parte hartzeko gonbita luzatuko diete.
Pedalei eraginez birziklatzen
Gainera, triziklo berezi bat ibiliko dira Zelaieta parkeko inguruko kaleetan. Informazio panel eta jolas parte-hartzaile batez hornitua dago eta ingurumen-hezitzaile bat arduratuko da herritarrekin harremana dinamizatzen.