50 bat lagun elkartu dira udaletxepean egin duten prentsaurrekoan. Adin guztietako jendea, emakume zein gizon, baina batez ere neska gazte asko. Haserre gaude, ez gara isilduko zioen pankarta ere zabaldu dute. Erasoaren salaketa irmoa burutu dute. "Ez dugu horrelako jarrerarik onartuko, ez hemen, ez inon. Ez dugu emakumeenganako erasorik, kontrolik, irainik eta mehatxurik onartuko", adierazi dute.
Kontatu dutenez, neskak aurre egin zion erasotzaileari, eta gero epaitegira joan zen salatzera. Emakume taldearen ustez, "emakume guztion aurkako erasoa" izan da, eta "beharrezko den bakoitzean" horrelako erasoak azaleratzeko prest daudela diote.
