Aurten hirugarren aldia egingo du moto kontzentrazioak, eta Ogenbarrenako jaien barruan sartu dute, lehenengoz, auzoko elkarteak horrela eskatuta. Etzi, 11:30ean, Zornotza ingurutik moto ibilaldia egingo dute. Bazkalordurako barbakoa bat ere prestatu dute. Izen-ematea 10:00etatik aurrera egin daiteke Ogenbarrenan bertan, 8 eurotan (moto ibilaldia, barkakoarako txartela eta motxila zein txapel bana). Gura duenak barbakoarako bakarrik den txartela ere eskuratu dezake, 4 euroren truke. Txistulariekin girotutako poteoagaz (13:30ean) zein herri kirol erakustaldiekin (16:30ean) ere gozatu daiteke egun horretan.
Joan zen asteburuan Iurretan antolatu zuten lasterketa solidarioak izandako harreragaz ere pozik daude La Otra Miradako kideak. Ia 200 lagunek parte hartu zuten lasterketan, eta Iurretako 46 establezimenduk bat egin zuten ekimenagaz, diru ekarpen zuzenak eginez eta zotz egin zuten otzararako produktuak emanez.
