Euren herriko jaietan aritzeko aukera izango dute Markeliñeko antzerkigileek, gaur. Herriko plazan eskainiko dute Crusoe lan berria, 21:00etan. Daniel Dafoek XVIII. mendean idatzi zuen naufragoaren istorioa oinarri hartuta, “Crusoe berezi bat sortzea” gura izan du Markeliñek obra berri honetan. Crusoeren biziraupenaren kontakizunari gaur egungo munduko hainbat errealitate txertatu dizkio Markeliñek: “Turismoak eragiten dituen kalteak, itsasoaren kutsadura, etorkinei egiten diegun harrera...”, esaterako.
Zuzeneko musikak ematen dio kutsu berezia kale antzezlan honi. Roberto Castro musikariak hainbat instrumentu jotzen ditu Zornotzako antzerki taldearen ikuskizun berrian, eta soinu efektuak ere egiten ditu: itsasoarena, animaliena, Crusoeren pentsamenduena...
Umeentzako antzerki emanaldiak ere badaude Zornotzako jai egitarauan: uztailaren 26an, adibidez, El gran Dimitri eskainiko dute, Zubiondo plazan, 19:00etan.