Zornotza Bizkaiko herri arteko finalaren ateetan geratu da

Anboto 2016ko ekainaren 20a

Zornotzak Lagun Onak pilota taldeko pilotariak

Miraria behar zuten eta ez zen gauzatu. Finalerdietan Zornotzak galdu egin du Markinaren kontra. Finala Markina eta Munitibarren artekoa izango da.

Joaneko jardunaldian 2-1 galduta, kanporaketa aldapa gora zuen Zornotzak. Atzo jokatu zen itzuliko jardunaldia. Kadeteetakoa nahiko erraz irabazi zuen Markinak: 11-22. Gazteetakoa izan zen partidurik ederrena. Joanekoan Zornotzako gazteek ez zuten euren mailarik eskaini, baina atzo bikain aritu ziren eta garaipena lortu zuten emozioz betetako partiduan: 22-21.

Aldeko eta kontrako tantoen balantzea kontuan hartuta —jardunaldi bietakoa— Markinak nahikoa zuen nagusietan tanto bakarra egitea finalera sailkatzeko. Berehala egin zuten eta, gainera, partidua erraz atera zuten aurrera: 5-22.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!