Bizkaiko Abesbatzen XXXI. Eguna ospatuko dute, ekainaren 8an, Zornotzan. 48 abesbatzetako 1.000 kantarik hartuko dute parte egun horretarako Bizkaiko Abesbatzen Elkarteak antolatu duen egitarauan.
Abesbatzetako kideak 10:00etan ailegatuko dira Zornotzara, eta Zelaieta zentroan entseguak egin ostean, 11:15ean kalejira hasiko dute herriko plazaraino. Plaza horretan eskainiko dute, 11:45ean, eguneko emanaldi nagusia. Gero, elkarrekin batuko dira bazkaritarako.
Zornotzako abesbatzak 60 urte
Asteburuan ospakizun bikoitza izango du SAC Zornotza abesbatzak, izan ere, taldea sortu zela 60 urte bete dira aurten. Urteurren hori ospatzeko, Zumaiako abesbatzagaz kalejira egingo du bihar eguerdian, eta, 21:00etan, Donostiako Easo abesbatzaren emanaldia izango da Zornotza Aretoan.