Zaldibar Argituk Eusko Jaurlaritzaren Industria, Trantszio Energetiko eta Jasangarritasun Sailak 2025eko irailean Zaldibarko zabortegian egindako ikuskaritzaren inguruko hainbat adierazpen kaleratu ditu.
Alde batetik, "onartezina" dela adierazi dute 29 hutsegite jasotzen dituen txosten teknikoa 5 hilabetean ezkutuan mantentzea. "Eusko Jaurlaritzak herritarrak informatu beharko lituzke, are gehiago inguruko bizilagunen osasuna eta segurtasuna arriskuan dagoenean".
Bestalde, kezka adierazi dute zabortegian aurkitutako irregulartasunengatik. "Ulertezina deritzogu horrenbeste denboran hutsegite horiek zuzendu ez izana. Oso larria iruditzen zaigu lixibiatuak inongo kontrolik gabe lurrera eta errekera isurtzea, oinarrizko azpiegituretan mantentze lanak ez egitea edo sortzen diren garsak tratatzeko sistema ez edukitzea", jarraitu dute.
Hori horrela, Jaurlaritzari arduraz jokatzeko eskatu diote.