[EGITARAUA]: Baserritarren Neguko Azoka eta dantza ikuskizun ugari Zaldibarko San Andres jaietan

Anboto 2024ko aza. 19a, 15:29
Deskargatu Info Ahotsak :

Zaldibarko Neguko Nekazaritza Azokaren edizio bat.

Domeka honetan Neguko Nekazaritza Azokaren 25. edizioa egingo da Zaldibarko kaleetan. 27 postu egongo dira, eta ogia, eztia, ortuariak, gazta, fruta, pateak zein gildak erosi ahal izango dira horietan. Horrez gainera, 19 artisau egongo dira. Lehenago, barikuan, dantza bertikala gozatzeko saioa eskainiko du Harrobi konpainiak. Olazar pilotalekuko hormetatik eskegita, artistek Geure(r) obra eskainiko dute. 

Zaldibar Neguko ospakizunetan -San Andres jaietan- murgilduko da datozen asteburu bietan. Udalak eta herriko elkarteek dena daukate prest aurtengoak ere herritar guztien gozamenerako jaiak izan daitezen. Ekitaldiak ostiral honetan bertan hasiko dira, Harrobi konpainiaren Geure(r)a dantza bertikaleko ikuskizunarekin. Ekitaldia ikusgarria izango da, dantzariak Olazar pilotalekuko hormetatik zintzilikatuko dira-eta musika, irudi-proiekzioak eta dantza batzen dituen emanaldia eskaintzeko.

27 nekazaritza postu

Igandeko hitzordu nagusia aspalditik errotutako Neguko Nekazaritza Azoka izango da. Aurtengoa, feriaren 25. urteurrena izango da. Edizio honetan, 27 baserritar ekoizlek parte hartuko dute: 8 okin, 5 gaztagile, 5 eztigile, ortuariak ekoizten dituzten 4 ekoizle, patea egiten duten 2 kide eta frutak zein gildak lantzen dituzten ekoizle bana egongo dira. Aipaturiko guztiez gainera, artisautza gaiei loturiko 19 postuz ere gozatu ahalko da.

Dantza, erdigunean

Lehen aipaturiko Geure(r)a ikuskizunaz gainera, Neguko jaiek dantzaz gozatzeko hitzordu gehiago eskainiko dituzte. Bigarren ostiralean, azaroaren 29an, Zaldibarko dantzarien taldeak txupinazoa jaurtiko du. Hitzordua 19:00etan izango da, udaletxeko plazan. Bestalde, abenduaren 1ean, Harria ikuskizunaz gozatzeko txanda izango da. Iñaki Perurena harri-jasotzailea eta Mulixka dantza konpainia Olazar pilotalekuan izango dira 18:30etik aurrera, dantza, narrazioa eta zuzeneko musika konbinatzen dituen ikuskizuna eskaintzen. Jaien antolakuntza dela eta, Zaldibarko Udalak herriko eragile bakoitzaren inplikazioa eskertu du. Era berean, jaiak errespetuz ospatzera deitu du udalak.

EGITARAUA

Azaroak 22, barikua

  • 20:00 Geure(R)a dantza bertikaleko ikuskizuna Olazar pilotalekuan

Azaroak 23, zapatua

  • 17:00-20:00 Ate irekien jardunaldia rokodromoan.

Azaroak 24, domeka

  • 11:00 Zaldibarko XXV. Neguko Nekazari Azoka.

Azaroak 29, barikua

  • 18:30-20:30 XXXI. argazki lehiaketako erakusketa udaletxeko pleno aretoan.
  • 19:00 Jaien hasiera iragartzeko txapligua jaurtiko du Zaldibarko dantzarien taldeak.
  • 19:30-21:30 Zaldibarko Arku Taldearen ate irekien jardunaldia, Olazarren.
  • 19:30 Pintxo solidarioak eta DJ Josemari Olazarren, Helmugak antolatuta. Batutako dirua Danobat emakume zentroarentzat izango da.

Azaroak 30, zapatua

  • 12:00-14:00 eta 18:30-20:30 XXXI. argazki lehiaketako erakusketa udaletxeko pleno aretoan.
  • 13:00 Zaldibarko Koral Elkarteko abesbatzak elizan abestuko du jubilatuen omenez Koralaren 79. Urtea gogoan hartuta.
  • 14:00 Jubilatuen bazkaria.
  • 18:00-20:00 Dantzatzeko Prest! Haurrentzako disko festa udaletxeko plazan. Euria bada, eskolako aterpean.
  • 18:30 Pilota partidak Olazar pilotalekuan.

Abenduak 1, domeka

  • 12:00-14:00 XXXI. argazki lehiaketako erakusketa udaletxeko pleno aretoan.
  • 16:30-19:30 JOKAI, Euskal mitologian oinarritutako jolasak eskolako kiroldegian.
  • 18:30 Harria ikuskizuna Olazar pilotalekuan, Iñaki Perurenaren eta Mulixka dantza taldearen eskutik.
Gizartea Zaldibar
ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!