Irailaren 22tik aurrera, eguenero izango dira jardunaldiak, Gabon zahar eguneko final handira heldu arte. Honako hauek dira datorren egueneko partiduak: Aurrekoetxea-Kuairan eta Olaetxea-Apezetxea binaka, eta Okamika-Etxeita kaiolan. Egueneko jardunaldiak 21:30ean hasiko dira.
Durangaldeak ordezkari bakarra izango du: Faben Ituarte atxondarra, lau t'erdian. Urriaren 6an estreinatuko da Zaldibarko txapelketan. Ituarte maila handian dabil, azkenaldian irabazitako txapelek eta lorturiko emaitzek erakusten dutenez. Ekainetik hona, Gasteizko eta Zaramagako pilota txapelketak irabazi ditu, besteak beste. Baina aurkariak ere ez dira nolanahikoak: Aristegi, Zubizarreta, Irribarria… denak goi mailakoak.
Binaka beste hainbeste gertatzen da. Hainbat dira txapela etxera eramateko hautagaiak, Mata-Irurita, Alberdi-Iztueta, Murua-Alduntzin… eta ez dago besteen gainetik gailentzen den bikote faboritorik. Txapelketak hiru hilabete iraungo du eta funtsezkoa izango da azken txanpara sasoian heltzea, baina ordura arte ez dago lo hartzerik, jardunaldi bakoitzeko galtzaileek etxerako bidea hartuko dute eta.