Felix Delgado trapagarandarrak irabazi zuen jaitsiera, errekorra ezarrita. Delgadok oso goian utzi zuen langa hurrengo aldietarako, izan ere, 55 segundoan jaitsi zen. "Jaitsierak badu berea, abiadura, bihurgune teknikoak, malda...", azaldu zuen txapeldunak. 40 bat lagunek parte hartu zuten jaitsieran, modalitate desberdinetan. Antolatzaileen lana goraipatzeko berbak ere eduki ditu irabazleak: "Oso giro polita egon zen eta segurtasun aldetik ere sekulako lana egin zuten antolatzaileek".
Aurten sortu dute Aldatsa elkartea, baina iaz Goierri auzoko jaietan ere antolatu zuten goitibehera jaitsiera; hamalau urteren ostean berreskuratu zuten proba. Pandemiaren eraginez bertan behera geratu diren probak berriro egiteari ekin diote Euskal Herriko beste hainbat herritan ere. Horrela, asteburu honetan, jaitsierak egingo dituzte Mutrikun (Gipuzkoa) eta Belauntzan (Gipuzkoa). Delgadok bietan parte hartuko du, baina ez dira udan egingo dituen jaitsiera bakarrak izango. Uztail hasieran, Zeanurin (Bizkaia) eta Diman (Bizkaia) egingo diren probetan ere lehiatuko da, gero Galizian jokatuko den Espainiako txapelketarako prestatzeko.