Zaldibar Argituren asmoa eskultura otsailaren 6an egindako ekitaldian ezartzea zen, hondakindegia amildu eta bi urtera egindako ekitaldian, Zaldibarko Udalak, ostera, baimenik ez ziela eman adierazi dute agerraldian, eskaera urtarrilaren 4an egin zuten arren. "Urtarrilaren 10ean, dekretu bidez, alkateak eskultura jartzeko baimena ukatu zigun. Harriduraz hartu genuen erabaki hau, are gehiago, ematen zuen arrazoia irakurrita. Horrela dio hitzez hitz: udal baimenik gabe jabari publikoan ezin da oroigarririk jarri. Horregatik aurkeztu genuen eskultura jartzeko baimen eskaria", azaldu du Jon Barañano Rodriguezek. Eskulturagaz, "gertaera haren oroigarri fisikoa bizia galdu zuten bi langileen omenez, beraien familia eta lagunen omenez, hondamendiaren eragina gertutik bizi zuten eta duten auzokideen omenez" eta horrelakorik ez errepikatzea eskatzea gura zuten.
Agerraldian, herritarren babesa batzeko ekintza sorta martxan jarri dutela azaldu dute, baita ere. Joan den astean, adibidez, Zaldibarko portaletan informazioa jarri zuten; horrez gainera, eskulturaren erreplika txikiak banatuko dituzte herriko denda eta tabernetan. Ekimen gehiago egiteko asmoa dutela iragarri dute.