"Kilometro inguruko jaitsiera da, azkarra, bihurgune askokoa, eta ikusteko ere ona izango da"

Eneko Iraeta (Tonucci), Antonio Villanueva (Gautxori) eta Oier Letamendi (Akerbeltz)

Udako egitarau kulturala borobiltzeko, Zaldibarko txosnaguneak goitibehera jaitsiera berreskuratu du. Hamarkada bat geroago, hamasei goitibeherak Goierri auzoko bidegurutzetik beherako aldatsa jaitsiko dute. 90eko hamarkada inguruan galduriko ohitura berreskuratzea da helburua, Oier Letamendia zaldibartarraren esanetan. Bera da ekimenaren antolatzaileetariko bat.

Antzeko jaitsiera bat 2007an egin zuten azkenengoz, Letamendiak dioenez. Iñaki Urizarrek eta  Arkaitz Ortuzar 'Pestu'-k erronka bota zioten elkarri, goitibeheragaz bata eta mountainboardagaz bestea. Mountainboarda patinete antzeko bat da, gurpil handiagoak eta balazta dituena. Itxaronaldi luzearen ostean, herritarrek gogotsu berreskuratuko dute jaitsiera, beraz. Goitibeherez gainera, parte hartzaileek bestelako tramankuluak ere edukiko dituzte: goitibeherak, mountainboarda, drift trikea...". Eta ibilgailuak ez ezik, gidariak ere askorikoak izango dira. "Zaldibartik kanpoko jendea ere gonbidatu dugu parte hartzera; beste herri batzuetan ez da galdu goitibeheren ohitura, eta horiekin sare moduko bat osatzea gura genuke", esan du Oier Letamendiak. Jaitsieraren ezaugarriak kontuan hartuta, segurtasun neurriak bereziki zaindu dituzte. "Kilometro inguruko jaitsiera da, Goierriko bidegurutzetik enpresen sarreraraino ia; jaitsiera azkarra da, bihurgune askokoa, eta ikusteko ere oso ona da. Asko disfrutatuko dugu, bai jaisten, eta baita ikusten ere", gaineratu du.

Antolatzaileak pozik daude jaitsiera berreskuratzeak eduki duen harreragaz, izan ere, hainbat belaunalditako zaldibartarrak batuko dira. 90eko hamarkadan erabiltzen zuten goitibehera bat berreskuratu dutela ere esan dute: "Hamalau urte geroago, hor egongo da berreskuraturiko goitibehera, aldats berean, gidari beragaz, jende beragaz, zaharrago badaude ere" (barrez).

Sputnik goitibeherak
Goitibeherekiko zaletasuna gazteenen artean ere zabaltzeko, Goitibehera Txikia ekitaldia egingo dute. 16:00etatik 18:00etara bitartean, umeak Sputnik goitibeheretan ibili ahalko dira, Maldanbehera elkarteagaz.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.