URA agentziak "nikel eta selenio mailak hauteman" ditu "prezipitazioak handitzearekin batera", eta horiek Aixola errekara ailegatu ez daitezen lanean dabil egunotan. Eitzagaetxebarriko ibarbidea izan daiteke URAren arabera, "ziurrenik", Aixola errekako lixibiatuen sorburua. Izan ere, beste behin, amonio eta OEK indizeak berriro ere gainditu dira bertan Aixolan, hain justu, errekak Egorekin bat egin aurreko puntuan. Neurtutako azken parametroak, baina, "aurreko egunetan" erregistratutakoak baino "txikiagoak" direla dio URAk.
Lixibiatuen sorburuak izan daitezkeen bi puntu posible aztertzen ari da URA. Eitzagaetxebarrikoa da bat, eta garai bateko autopista irteerako drainatze-sistemakoa da bestea. Azken puntu honetan "ohiko kontzentrazioa baino maila handiagoak dituzte" amonioak eta OEK indizeak, "baina zabortegiko lixibiatuek duten kontzentrazio askoz txikiagoetan".
Kamioi xurgatzaileen lana
URAk dioenez, "Aixola errekara egindako isurketen zati handi bat kentzea lortu da" otsailaren 20tik martxan dauden "kamioi xurgatzaileen" saneamendu sistemari esker. Aixola errekara "1.352 metro kubiko" lixibiatu isurtzea ekidin dela dio.