Zaldibarko jaiak

Zaldibarko Dominika talde feministak erasorik eta erasotzailerik bako jaien aldeko txupina jaurtiko du

"Hasi berriak bai, baina ez jaioberriak", esango dute Dominika talde feministako kideek jaietako pregoian. Eurek jaurtiko dute aurten txupina, eta pozik daude enkarguagaz. "Sekulako ilusioa egiten digu; gure aldarrikapenak jaietan ozen zabaltzeko aukera paregabea dugu orain", esan dute. Ez da Zaldibarko jaiei egiten dieten ekarpen bakarra, izan ere, jaietako brigada feminista ere sortu zuten. Taldea 2018ko abenduaren 14an sortu zen. Hala ere, taldeko kideetariko asko aurretik ere lanean ibilitakoak dira emakumeen eskubideen alde. 

Euskal Herri osoan zehar dabilen olatu feminista hartu, eta herrian ekarpena egiteko helburuagaz jaio zen Dominika. Ordutik hona, jaietako brigada feministak, martxoaren 8ko greba orokorra eta beste hainbat ekimen antolatu dituzte. Eraso matxisten aurkako protokoloa ere osatu dute azkenaldian.

Iazko jaietan, lehenengoz, brigada feministak antolatu zituzten jaietarako, eta ekimenaren balorazio positiboa egin dute Dominikakoek. "Herriko neska talde batzuek eraso matxistak jasan zituzten, eta brigadara jo zuten. Neurriak hartu eta erasotzaileak kanporatzea lortu zen", azaldu dute. Aurten ere martxan egongo dira brigadak. Horretarako, formakuntza saioa jaso zuten ekainaren 24an, erasoen aurrean "aktiboki eta jarrera feministagaz" erantzuten jakiteko. Zaldibarko emakume guztiei brigadetan parte hartzeko deia egin diete.

Dominikaren omenez
Dominika emakume zaldibartarrak 70eko hamarkadan herrian egindako lanaren aitortza legez darama bere izena Zaldibarko talde feministak. "Zegoen legediari aurre eginez, abortua praktikatzen zuen. Egundoko lana egin zuen emakumeen eskubideen alde, eta berari omenaldi lez aukeratu dugu bere izena", azaldu dute Dominika taldekoek. Ikerketa lanetan murgilduta daude orain taldeko kideak. Diotenez, Dominikak inguruko emakumeei laguntzen zien, orduko "zurrumurru eta begirada txarrei" jaramonik egin barik. Garai hartako emakumeen egoera aldatzea zuen helburu.  

Gozatzea, guztien ardura
Dominika taldekoek herriko jaiak guztientzat direla nabarmendu gura izan dute hasieratik: "Hasiberriak bagara ere, hemen izango gara beti, eraso matxistarik bako jaien alde borrokan, ausartak izateari utzi eta libre izan gura dugulako. Kaleak eta gauak geureak dira!".

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.