Ane Fernandez zaldibartar gaztea argia ikusten hasi da tunelaren amaieran. Hilabete askoan buruhausteak eragin dizkion belauneko lesiotik bueltan, lan bikaina osatu zuen joan zen asteburuko Bizkaiko Txapelketan. Kadete mailan brontzezko domina kolkoratu eta, hori gutxi balitz, maiatzaren 26an Durangoko Landako kiroldegian lehiatuko den Euskadiko Txapelketara sailkatzea lortu zuen.
Lesioaren zoritxarrari borondate handiz aurre egin dio Fernandezek, Olazarmendi klubekoek ohar batean jakinarazi dutenez. “Hilabete bian aulki batean eserita aritu da mazekin entrenatzen Euskadiko Txapelketarako errekuperatuko zen esperantzagaz. Azkenean, orain aste bi bere saioko muntaia egokitu ahal izan genuen parte hartzeko aukera izan zezan”.