Zaldua Kirol Elkartean futbol kontuei buruz arduratzen den adarrak abiatu du asmoa. Iazko ekainean zuzendaritza berritu zuen, eta lan talde berriak emakumeen futbola sustatzeko erabaki sendoa hartu du.
Kadete, gazte eta nagusi mailako talde bana sortzea gustatutako litzaieke. Beraz, deialdia 2002an edo urte horren aurretik jaiotako emakumeei zuzenduta dago. “Badakigu hiru talde sortzea zaila izango dena, baina, lehenengo ahalegina dela kontuan hartuta, talde bat sortuko balitz pozik geundeke”, azaldu du Roberto Terroba klubeko zuzendaritza batzordeko kideak.
Zaldibarko emakumeei zein inguruko herrietakoei irekita dago deialdia. Interesa duenak ondoko helbide elektronikora idatzi dezake: infozaldua@gmail.com. Zaldua futbol taldeko webguneko (www.zalduafutboltaldea.org) foroan, emakumeen taldea sortzeari buruz iritzia emateko aukera ere eskaintzen dute.