2012. urtean hasi zen Zabarte Jende desegokia idazten, eta urtebete baino gehiagoko lanaren emaitza da. Peter Zuazo protagonistak jasotzen duen gonbidapen bat da nobelaren abiapuntua: Desegokien Elkarteak antolatu duen topaketa batean parte hartzeko gonbita. Elkarte horretako pertsonen eta Zuazoren bizitzak gurutzatzen direnean sortzen diren gorabeherak kontatzen ditu nobelak, eta badago atzera begirako zati bat ere: orainaldian eragina duten 1980ko hamarkadako gertakari batzuk kontatzen dira nobelaren beste parte batean.
Pertsonen arteko hurbiltze eta urruntzeak, amodio eta desmodio kontuak, mendekua, botere harremanak, pertsona taldeen artean sortzen diren gatazkak... Horiek guztiak jorratzen ditu Zabartek nobelan.
Postari eta idazle izandako Zuazogaz batera, Odile Mores emakumezkoa da Jende desegokia laneko beste protagonista.