Azken batean, gaur egungo egoera "osasun krisiaz haratago" doan arazoa dela uste dute Otxandioko Gazte Asanbladako kideek, eta "ertz askotatik" aztertu beharreko gaia dela. "Horrela, badira lanik barik gelditu eta alokairuak ordaintzeko gaitasunik ez duten familiak, etxean jasaten duten indarkeria matxistatik ihes egiteko aukerarik barik geratu diren emakumeak edo beharrezkoa den babeserako materialik barik lanera joan behar diren langileak", arrazoitu dute sare sozialetan publiko egindako testu batean.
Otxandio ez da "salbuespena"
Egoera baloratuta, beste hainbat herritako gaztetxeetan martxan ipinitako ekimenagaz bat egin eta dinamika Otxandiora zabaldu dute. Izan ere, eskubide urraketetan Otxandio ez dela "salbuespena" azaldu dute. "Hemen ere egoera honen lehenengo ondorioak ikusi daitezke hainbat esparrutan, bai salbuespen egoerarenak, bai krisi ekonomikoarenak", diote.
Testigantzak jaso eta gero, eurekin zer egin pentsatuko dute. Helburua gizartean eztabaida eragitea denez, testigantza batzuk modu batean edo bestean publiko egitea izan daiteke aukeretariko bat.