Urte bat eta sei hilabeteko eta bi urtera arteko zigorra ezarri diete 45 epaituri eta kartzela saihestuko dute. Talde horretan dago Egoitz Lopez de Lacalle otxandiarra. Arantza Zuluetari eta Jon Enparantzari, aldiz, hiru urte eta sei hilabeteko eta bi urte eta zazpi hilabeteko zigorra jarri diete, hurrenez hurren. Orain arteko espetxealdia kontuan hartuta, hilabete batzuk egin beharko dituzte kartzelan, BERRIAk informatu duenez.
Auzipetuak banaka aritu dira deklaratzen eta leporatzen zaizkien delituak onartzen dituztela esan dute guztiek. Fiskalak eskaera berria egin du: Arantza Zuluetari eta Jon Enparantzari erakunde terroristako kide izatea egotziko diete eta gainerako 45 auzipetuei, berriz, parte hartze aktiboa izatea.
Espetxea ekidin arren, hiru urterako inhabilitazio absolutua jasoko dute epaituek, BERRIAk bere webgunean azaldu duenez.
