Areitiok azaldu duenez, taldea ustekabean sortu zen. "Dantza taldeko Igone Ikobaltzetak gazte batzuk taldera batzea gura zuen, baina ez ziren animatzen. 'Zelan ezetz!', esan nuen, ‘guk egin ahal izangez gero…’. Eta Igonek esan zigun: ‘Ba, hasi zuek ere’". Horrela abiatu zen taldea. Hasieran Ikobaltzeta izan zuten irakasle, eta gero Maria Bizkarragaz jarraitu zuten. Eurei eskerrak, jairik jai egiten zituzten hainbat dantza ikasi zituzten.
Taldeko nagusiena Kontxi Agirre da, 80 urtegaz, eta Iriondok 75 ditu. Martitzenero batu izan dira entseguetan, eta dantza bi prestatzen aritu dira: gorulari dantza eta sagar dantza, "geurera moldatuta", Areitiok azaldu duenez. Horiek dantzatuko dituzte ospakizunean. Entseguak giro onean egiten dituztela nabarmendu du: "Oso ondo pasatzen dugu". Ospakizunari begira, "ilusioz" daude guztiak eta onena emateko prest.
