Zelako negua izan da aurtengoa?
Azken urteotan izan dugun neguagaz alderatuta, aurtengo negua gogorra eta luzea izan da. Esaterako, Mallabian aurtengo neguan lau bat bider izan dugu elurra.
Negurik gogorrenetarikoa dela esan daiteke?
Ez, izan ditugu negu gogorragoak. Orain 25 bat urte astebeteko elurteak izaten genituen. Elurra kendu orduko berriro egiten zuen eta etxetik mugitu ezinik egoten ginen. Aurten ez dugu horrelakorik izan. Otsailaren 28an elur dezente egin zuen arren, eguerdirako errepideak garbi zeuden eta etxetik irteteko moduan egon ginen.
Auzoko bideak garbitzen ibilitakoa zara.
Bai. Lehen auzo bakoitzak zuen ardura bere ingurua garbitzeko. Gu, esaterako, traktoreagaz eta guk egindako burdina batzuekin aritzen ginen auzoa garbitzen. Azken urteotan, udalak du ardura hori.
