Konfinamenduaren osteko mendi bueltak direla-eta, Iurretako Zaldai Mendi Taldeak hainbat erabaki hartu ditu. Aldaketa batzuk egin ditu jada urteroko ohitura bihurtu duen Mendi Erronkako arautegian. "Normaltasun berrian ez dugu mendira joateko eragozpenik eta horrek konfinamendu osteko garai hau asko arindu digu. Hala ere hilabete batzuk pasa ditugu mendi ezberdinak bisitatzeko aukerarik gabe, eta hori ikusita, Mendi Erronkako arautegian ere aldaketatxo batzuk egin ditugu aurtengo erronka eskuragarriagoa egiteko. Hala, aurten, zerrendako 5 eremu ezberdinetako 10 mendi igo beharrean, 4 eremutako 8 mendi igotzea nahikoa izango da erronka amaitutzat emateko", azaldu dute Mendi Taldeko iturriek.
Iurretako mendi martxa ez; argazki lehiaketa bai
Zaldai Mendi Taldeak Iurretako mendi martxa antolatu ohi du irailero. Bada, aurtengoa ez egitea erabaki du. Jende pilaketak saihestu gura dituzte. "Mendi martxako irteera unean, hornidura puntuetan eta ibilbideko zenbait puntutan gertatzen diren jende pilaketak saihestezinak iruditzen zaizkigu eta distantziamenduak gainera mendi martxaren izaera herritarra ere gutxituko lukeela uste dugu", arrazoitu dute.
Bestalde, egin, egingo diren bi ekintza aurreratu dituzte. Argazki lehiaketa izango da bata, eta Mendi astea bestea. Argazki lehiaketa Mendi erronkari lotua dago. Erronkan zehar hartzen diren irudiak aurkeztu ahalko dira bakarrik lehiaketara. Mendi astea, berriz, 2021eko urtarrilean egingo dute. Aurrerago emango dituzte xehetasunak.