Bertan egoteko eta paseatzeko lekua bihurtu gura dute hezkuntza zentroetara sartzeko inguru hori; Olaburu frontoia eta karrejua ere badaude bertan. Lan horiekin oinezkoentzako lekua eta segurtasuna irabaziko dutela azaldu dute Iñaki Totorikaguena alkateak eta Angel Basabe udal arkitektoak. "Karrajuaren parean, miradore izateko balio lezakeen plataforma bat sortu gura dugu, eskailera batekin. Inguru guztia, led argiteriarekin, iturri batekin eta altzariekin osatuko genuke", argitu dutenez. Eskailera horien bitartez Etxegora sarbidea egokituko litzake. Ibilgailuen sarrera mugatuta egongo litzateke, orain lez. Baina, aparkalekuak kendu egingo dituzte.
Obrak lizitazio fasean daude, eta maiatzean eman gura dituzte lanak udal arduradunek. Bi hileko iraupena izango lukete, eta udako oporrekin bat egiteko nola egin aztertuko dute, "eskolaumeen ikasturtean ahalik eta gutxien eragiteko", Totorikaguenak azaldu duenez. Irailerako ingurua berrituta egotea gura dute.
