Alarde parekidearen alde dagoen Jaizkibel Konpainiak Berdintasun Saria eman die emakume bertsolariei aurten. Kristina Mardaras iurretarrak beste bertsolari batzuekin batera sari hori jaso zuen joan zen zapatuan, Hondarribian. Errekonozimenduaren aurrean, alardea ikustera joateko gogoa piztu zaio Mardarasi. Goizeko lehen orduan kalean zen ospakizunaren lekuko.
Baina, ospakizuna aldarrikapen bilakatu da azken 20 urteotan Hondarribian. Jaizkibel alarde parekidearen aldeko konpainiak hamarkada bi daramatza txistu eta plastiko beltz artean desfilatzen. Iurretarrak dioenez, "aurreko urteetan baino plastiko txikiagoa ikusi dugu. Kale Nagusian plastikodunak gerriraino bakarrik estali dira". Mardarasen ustez, alarde parekideak "gero eta babes handiagoa" dauka .
Goizean, Mardarasek Marije Berrotaranekin bat egin du. Berrotaranek 20 urte daramatza Jaizkibel konpainian desfilatzen. Bi hamarkada hauetan erabilitako zapia oparitu dio iurretarrari. "Ezagun eta bidegile" direla azpimarratu du iurretarrak
Mardaras mugak apurtzen
Kristina Mardarasek badaki berdintasunaren bidean mugak apurtzea zenbat kostatzen den. Bertsolaritza modernoaren aroan erreferentzia bat da Mardaras, Euskal Herriko Txapelketa Nagusian parte hartu zuen lehen emakumea izan baitzen, 1986an. Aurretik, plazarik plaza ezagun egin zen bertsolaria.
