Hegoafrikako IronManean lan bikaina egin du Gurutze Frades iurretarrak. Uretatik irten eta bizikletara igo denetik aurrera postuak irabazten joan da bata bestearen atzetik bosgarrenera heldu arte.
Bizikletako tarteko 155. kilometroan 13. zihoan. Maratoiko 24. kilometroan 10. postuan zegoen. Azken lau kilometroetara heldu denean, hirukote batean zihoan eta bosgarrenetik zazpigarrenerako postuak zeuden jokoan. Azkenean, hirukoteko indartsuena izan da eta, gainera, 21 segundora bakarrik geratu zaio laugarren tokia.
Emakumeetan Daniela Ryf suitzarrak irabazi du IronMana: 08.47.01. Gurutze Fradesek 37 minutu eta 56 segundo geroago amaitu du.
