Iñaki Totorikaguena alkatearen kontrako errefusatze-intzidentziaren prozedura aurrera doa. Goiuriako kofradiak luzatutako galderak erantzuteko hamar egun baliodun ditu alkateak. Onartutako lekukoentzako galderak ere onartu dituzte azken udalbatzarrean.
Lukupeko Troka eta Luku-Txiki ibarbideak (Luku-Baso S.A) lurrez betetzeko lizentzia aprobetxatuta izan diren ustezko legez kanpoko jarduerak argitu guran pauso berri bat eman du udalbatzak. Horretara, eta Goiuriako kofradiak Iñaki Totorikaguena alkateaten kontra aurkeztutako errefusatze-intzidentziaren barruan, alkateak eta onartutako lekukoek erantzuteko galderak onartu dituzte.
Iazko ekainean eta uztailean baimen barik ehunka kamioien edukia isuri zela salatu zuten Goiriako kofradiakoek, 2009ko lur-jausiak sortutakoak konpontzeko sarbide-pistaren “legez kanpoko” obratarako baimena aprobetxatuz; 2006tik ezin zitekeen ezer isuri. Jarduera ez zutela eten ezta zehapen espedienterik agindu arrazoitu dute kofradiakoek errefusatze-intzidentzia tramitera eroateko.
Lukupeko Troka eta Luku-Txiki ibarbideen betetze egitasmoari buruzko espedientean, 2007ik ibarbideotako mugimenduei buruzko txostena batzea ere onartu dute udalbatzarrean. Txostenean jasotakoak baino ez dira onartuko errefusatze-intzidentzia prozeduran. Kofradiak aurkeztutako froga gehienak baztertu dituzte. Hori berretsi dute EAJ, PP eta PSE-EEk; Bilduk ez.