Iaz, euri zaparradak zirela eta, jaia ezin izan zuten bere aldarterik koloretsuenagaz ospatu. Alabaina, aurten, arantza hori kendu dute garaitarrek. Eguzkiak polito sakatu du eguerdi inguruan, eta asko izan dira autoz zein oinez Garaira hurbildu direnak. Loreez eta landareez gainera, tokiko baserritar ekoizleen produktuak ere egon dira salgai, hala nola gazta, garagardoa, marmeladak eta pastelak. Txosna batek taloak eta edariak eskaini ditu, sendo. Nagusien elkarteko kideek primerako lana egin dute azokazaleei kontsiguna edo gordailu zerbitzua eskainita.