Zapatu honetan Asto Trailen laugarren aldia egingo dute Garain. Hiru hitzorduak kontuan hartuta —lasterketa luzea, laburra eta mendi martxa—, 320 parte hartzaile batuko dira.
Hiru probak udaletxe ondotik irtengo dira. Martxa 08:30ean hasiko da, lasterketa luzea 09:30ean, eta lasterketa laburra 10:00etan.
Garai Traitloi Taldekoek aurten antolatu dute, lehenengoz, proba laburra, eta pozik daude izan duen harreragaz. 127 parte hartzaile izango ditu. Proba laburrak eta martxak ibilbide bera izango dute, eta, besteak beste, Askako eta Jandolamendi mendiak igoko dituzte. Martxan 122 lagunek parte hartuko dute. 28 kilometroko proba luzean Oizko gailurreria osoa egingo dute, iaz hasitako bideari jarraituta. Proba luzerako 72 korrikalarik eman dute izena.
Gaur, barikua, parte hartzaileek dortsala jasotzeko aukera dute Garain, 16:00etatik 20:00etara. Ahal dela gaur joateko eskatu dute antolatzaileek, lasterketa egunean lasaiago eta denboraz ibiltzeko. Ahal den neurrian kotxeak bide ertzean eta txukun aparkatzeko ere eskatu dute.
