[EGITARAUA] Alpinismoa, eskalada eta hamaika abentura, Erdellak antolatutako Mendi Astearen barruan

Aurtengo protagonistetako bat Martin Urrutia elorriarra izango da. Bestelakoan, Himalayako tontorrak, Islandiako paisaia ederrak eta Euskal Herriko txoko ikusgarriak gerturatuko dizkigu aurtengo Mendi Asteak.

'Aketegiko Mari, Alpinismoa eta mitologia uztartzen'. Koke Lasa alpinistarekin. Mitologiak eta alpinismoak bat egin dute Koke Lasa alpinista ormaiztegiarrak sortutako azken ikus-entzunezkoan. Bertan gazte batzuk Mari eta bere kobazuloa bilatzen saiatzen dira. Bilaketak Aizkorri, Txindoki, Anboto, Murumendi, Itxina eta beste hainbat tokitara eramango ditu gazteak.

'Neguko Himalaya ganberaren atzean'. Phelipe Eizaguirrerekin. Argazkigintzan eta ikus-entzunezkoetan aditua den bilbotarrak Alex Txikon mendigoizalearen hainbat abentura hilezkortu ditu eta bere kamerako objetiboaren bidez eta eurei buruz ariko da Elorrion.

'Westfjords Islandia ezezagunera bizikletaz'. Igone Mariezkurrenarekin. Islandiako Westfjords zonaldeko fiordoek ur-jauzi ederrak, itsaslabar ikusgarriak eta putzu geotermikoak barnebiltzen dituzte, besteak beste. Inguru haiek bizikletan bisitatu dituen Igone Mariezkurrenak bere bizipenak kontatuko ditu.

'Arrokatik nire bizitza'. Martin Urrutia eskalatzailearekin. Gaztea izanagatik lorpen baten baino gehiagoren jabe da eskalatzaile elorriarra eta eurei buruzko hitzaldia eskainiko du bere sorterrian.